Иницијативата Шанса за Центар реагира дека поради градежните активности на локацијата под ризик се децениски старите дрвја во скопскиот Урбан парк во Општина Центар.
Оттаму ја повикуваат Општина Центар и Градот Скопје да не дозволат овој парк да биде искористен од инвеститорот „Лимак“ за пристап до градежна парцела и да се најде друго решение со кое нема да се уништи и узурпира оваа зелена површина.
„Да потсетиме, инвеститорот на располагање за големите градежни зафати има површина од над 66.000 м2 и може да најде решение за пристап до парцелите без да го узурпира единствениот парк во подрачјето со површина од околу 4.000 м2. Тоа воедно е единствениот парк сѐ до паркот Жена борец пред Собранието. Да не заборавиме дека и Паркот на новинарите според урбанистичките планови е предвидено целосно да го снема, односно да биде претворен во џиновски кружен тек и во градежни парцели“, велат од Шанса за Центар.
Од иницијативата информираат дека побарале информација од Општината дали на инвеститорот „Лимак“ му е одобрен пристап до градежна парцела и дали Градот Скопје има издадено дозвола за сечење на дрвјата во паркот.
„Доколку е одобрен таков пристап бараме Општината и инвеститорот да најдат друго решение со кое нема да се узурпира и уништи Урбан парк. До Градот Скопје апелираме доколку постојат решенија за сечење на здравите и раскошни дрвја да ги ревидира и да го запре извршувањето. Доколку се исечат дрвјата потоа никакви донации од инвеститорот во клупи, плочки и грмушки, според идејниот проект што го сподели Кирил Пржо не можат да ја надоместат загубата и тоа само ќе придонесе во зголемување на загадувањето на воздухот и создавање на нов топлотен остров во Центарот на Скопје. Тоа само ќе го влоши животот на сите граѓани кои живеат во околината на паркот, но и на новите кои ќе се вселат во становите на Лимак“, посочуваат од Шанса за Центар.
