Срча, отпад, демолирани кошеви и столчиња, градежен шут… вака денес изгледа спортската сала наменета за Универзитетот „Св. Кирил и Методиј“ – Скопје (УКИМ) изградена пред 3 години на кампусот зад Економскиот факултет. Во неа сега може да влезе кој сака, бидејќи е оставена без врата. Објектот чии темели беа поставени во 2013 година целосно е запуштен, руиниран и оставен на милост и немилост како јавен нужник.
За изградбата на салата, за која е надлежна Агенцијата за млади и спорт (АМС) и беше дел од проектот за изградба на 35 спортски сали од Владата, беа издвоени 2,5 милиони евра од државниот буџет. Тендерот му припадна на Друштвото за градежништво, трговија и услуги „Алконпроект“ од Скопје.
Во моментов, од Агенцијата за млади и спорт го има само логото над главниот влез на салата која секојдневно се распаѓа во сопствениот отпад.
Однадвор, освен отстранетата врата и неколкуте скршени прозори, зградата е целосно готова и доколку се изземат разните графити на фасадата, таа изгледа речиси пристојно.
Вистинскиот шок започнува внатре. Во средина на салата се искршените и фрлени кошеви и изместени голови, а мрежите висат заедно со бројните пајажини. Покрај ситните отпадоци што даваат знаци дека салата секојдневно служи како контејнер на несовесните граѓани, подот на салата е ишаран со дамки од урина, а врз него има и расфрлани црвени столчиња од трибините, стакло и други градежни материјали и пластични предмети.
Левиот страничен ѕид на зградата од каде се влегува внатре
Салата внатре
Внатре под скалите кои водат до трибините
На вратите внатре сè уште се закачени имињата на просториите што требало да бидат тоалети, соблекувални и канцеларии, а според проект планот во фискултурната сала било предвидено да има и просторија за теретана. Во некои од тоалетите ги има речиси сите елементи, додека во други тие се украдени.
Во горниот десен блок од трибините има оставено алишта, а изгледа дека само рефлекторите останале исправни.
Овој простор некогаш бил планиран за теретана
Рефлекторите
Пред речиси десет години, кога беа ставени камен темелниците на објектот, од тогашната Влада беше ветено дека изградбата на салата ќе трае две години и потоа објектот ќе се предаде на користење на УКИМ.
Една деценија по најавувањето на ултрамодерната сала што требаше да ја добијат студентите на четирите факултети на овој кампус, таа е готова, но сепак не е во состојба да служи како простор каде треба да се одржуваат редовни часови по предметот Спорт и здравје.
„Идеме на Машински зошто нашата сала е руинирана“, вели студент на катедрата за Филозофија при Филозофскиот факултет.
„Имав предмет Спорт и здравје и се одржуваше во салата на ФЕИТ“, истакна друга студентка на Филозофски факултет.
„Алконпроект“ во 2018 година ја тужеше АМС дека не ја платила сумата за конкретната фаза. Основниот суд во Тетово, а потоа и Апелациониот суд во Гостивар тогаш пресудија во полза на Друштвото за градежништво дека АМС треба да исплати 440.000 евра, кои со камата, парнични трошоци и извршителска награда, на крајот стана сума од околу 810 илјади евра.
Во 2020 година застапувана од Државното правобранителство, Агенцијата поднесе ревизија на судската одлука, а тоа го истражуваше редакцијата на емисијата 360 степени.
Радио МОФ испрати прашања до Државното правобранителство за тоа до каде е судскиот процес, а потоа ги прашавме и од Агенцијата за млади и спорт што се случува со салата и дали некогаш таа ќе се отвори за студентите како што беше ветено. До објавувањето на овој текст не добивме одговори на нашите прашања.
За состојбата се обративме и до ректоратот на УКИМ од каде исто така не ни кажаа ништо.
Студентите од 21 катедра од Филозофски, Филолошки, Економскиот и Правниот факултет со години немаа каде да ги одржуваат часовите од задолжителниот предмет, а денес иако има сала, тие сè уште се приморани да одат во објектите на факултети што се наоѓаат во другиот дел од Скопје.
Фото: Радио МОФ
Ангела Бошкоска
