Ноќен напад со ракети и дронови врз Украина усмрти најмалку четворица луѓе и повреди уште 20 во Киев, изјави денеска градоначалникот на градот, Виталиј Кличко. Русија нападна најмалку шест региони низ државата со вкупно 407 дронови и 44 ракети, што претставува еден од најмасовните координирани напади во трите години од војната, пренесува новинската агенција Асошиејтед Прес.
Портпаролот на украинските воздухопловни сили, Јурии Ихнат, соопшти дека нападот вклучувал балистички и крстосувачки ракети, како и мешавина од ударни дронови и мамки. Украинските сили соопштија дека собориле околу 30 од крстосувачките ракети и до 200 од дроновите.
Украинските градови се редовно бомбардирани откако Русија ја започна инвазијата врз својот сосед во февруари 2022 година. Нападите досега усмртиле повеќе од 12.000 цивили, според Обединетите нации.
Воените дејства продолжуваат без прекин, иако дипломатска иницијатива предводена од САД донесе две рунди директни мировни разговори меѓу делегации од Русија и Украина. Разговорите не донесоа значајни резултати, а двете страни сè уште имаат многу различни ставови околу условите за завршување на војната.
Украина понуди безусловен 30-дневен прекин на огнот и средба меѓу претседателот Володимир Зеленски и рускиот лидер Владимир Путин за да се пробие „ќор-сокакот“. Но, Кремљ ефективно ја одби таа понуда и не отстапи од своите барања.
Путин, во телефонски разговор со претседателот на САД, Доналд Трамп, порача дека ќе одговори на украинскиот дрзок далекусежен напад врз руски воздухопловни бази во неделата.
Ноќниот напад се случи само неколку часа откако Трамп изјави дека можеби е подобро Украина и Русија „да се борат уште некое време“ пред да бидат разделени и да се продолжи со мировен процес — изјава што претставуваше значајно отстапување од неговите претходни повици за итен прекин на војната.
Во Русија, воздушната одбрана соборила 10 украински дронови што се движеле кон главниот град, соопшти градоначалникот на Москва, Сергеј Собјанин. Летовите на московските аеродроми биле привремено суспендирани во текот на ноќта како претпазливост.
Украински дронови погодиле и три други региони во Русија, каде, според властите, биле оштетени станбени згради и индустриски погони. Повредени биле тројца, соопштија официјалните лица.
Руското Министерство за одбрана информираше дека воздушната одбрана соборила 174 украински дронови над 13 региони во петокот наутро. Исто така, соопшти дека биле соборени и три украински ракети „Нептун“ над Црното Море.
