МОН очекува да биде надминат проблемот со парно греење на Универзитетот „Св. Кирил и Методиј“ кое е доведено во прашање откако снабдувањето со топлинска енергија го презеде „Балкан енерџи груп“ и е неизвесно дали од почетокот на грејната сезона за студентите и професорите ќе има затоплени училници.
Според министерот за образование и наука, Спиро Ристовски, МОН е во комуникација со УКИМ и неговите факултети и ќе го утврдуваат долгот што новиот снабдувач лани го наследи од „Топлификација“.
Одговарајќи на новинарско прашање, Ристовски не прецизираше колкава сума побарува новиот стопанисувач со парното греење. Тој уверува дека ситуацијата ќе биде надмината но, како што рече, не може однапред да претпоставува.
„Минатата година се изврши промена на сопственоста на фирмите кои стопанисуваат со топлификациската мрежа, така што сега се прават некои корекции, односно потврдувања на долговите кои се однесуваат на новата компанија и кои биле од претходната компанија, и очекуваме овие ден-два да ги расчистиме тие состојби“, рече Ристовски.
Министерот додаде дека МОН не доцни со исплатата на блок-дотациите и се обидува навреме да ги сервисира обврските кон образовните институции кои не се директни корисници на централниот буџет.