Стигнаа номинациите за 98-те Оскари, а историскиот музички хорор-филм „Sinners“ на Рајан Куглер освои вкупно 16 номинации, со што го сруши рекордот за најмногу номинации за еден филм, кој досега го држеа „All About Eve“ (1950), „Titanic“ (1997) и „La La Land“ (2016). Номинациите за „Sinners“ вклучуваат најдобар филм, режија, оригинално сценарио, како и индивидуални актерски номинации за Мајкл Б. Џордан, Вунми Мосаку и Делрој Линдо.
Комичниот политички трилер на Пол Томас Андерсон, „One Battle After Another“, следи со вкупно 13 номинации, меѓу кои и за најдобар филм, режија, адаптирано сценарио, како и актерски номинации за Леонардо ДиКаприо, Тејана Тејлор, Бенисио Дел Торо и Шон Пен.
Вонземјанската комедија на Јоргос Лантимос „Bugonia“, трагичната шекспировска драма на Клое Жао „Hamnet“, тркачката драма на Џозеф Косински „F1“, готскиот филм на Гиљермо дел Торо „Frankenstein“, пинг-понг филмот на Џош Сафди „Marty Supreme“, бразилскиот политички трилер „The Secret Agent“, норвешката семејна драма „Sentimental Value“ и лирската историска драма на Клинт Бентли „Train Dreams“ ја заокружија листата на номинирани за најдобар филм.
Актери од „The Secret Agent“ и „Sentimental Value“ исто така добија актерски номинации, што ја прави оваа година уште една успешна година за „интернационалните“ филмови. Меѓу другите најмногу номинирани филмови се „Frankenstein“, „Marty Supreme“ и „Sentimental Value“, кои добија по девет номинации.
Сите номинации може да ги видите ТУКА.
