Во домашното издаваштво излегува првата нема сликовница – книга што раскажува приказна без ниту еден напишан збор. Станува збор за „(С)обувки“, ново издание на Арс Ламина, објавено преку детскиот импринт Либи.
Идејата за книгата е на Оливера Ќорвезироска, а илустрациите ги потпишува Наталија Лукомска. Наместо текст, приказната се развива исклучиво низ визуелна нарација. Низа обични луѓе и ликови од бајки и книжевни дела боси чекаат ред кај „најдобриот чевлар на светот“, каде секој ги добива своите идеални обувки. Исклучок е едно девојче, на кое му остануваат чевли со високи потпетици – избор што таа го прифаќа со радост, заминувајќи од приказната по сопствена мерка.
Промоцијата е закажана за 20 февруари во книжарницата „Литература.мк“ во „Дајмонд мол“, во рамките на манифестацијата „Денови на литературата“. На настанот, покрај авторката и илустраторката, ќе учествуваат и писателите Владимир Мартиновски, Елизабета Баковска, Ермис Лафазановски и Никола Маџиров, кои ќе понудат свои читања на визуелната приказна.
Сликовниците без текст се релативно нов жанр во светската продукција. Нивната специфичност е што ги надминуваат јазичните бариери и го претвораат читањето во заеднички креативен процес меѓу децата и возрасните. Наместо готова порака, тие нудат простор за толкување, развивање на говорот и градење сопствени приказни.
