Перформанс „Мене ништо не ми пречи“ на „Театар Пи“ во паркот во Ѓорче Петров

Во паркот на Ѓорче Петров утре (среда, 30 јуни) од 20 часот ќе се одржи перформансот „Мене ништо не ми пречи“ на „Театар Пи“.

Се работи за концерт на класична музика и џез импровизации со Дино Имери, Дино Рамо, Ема Ананисевска, Златко Митрески, Игор Ангелов, Јаков Ангелов, Ева Малин, Ана Тодоровска и изложба на фотографии чии автори се лица со интелектуална попреченост од ЦПЛИП- Порака Скопје и ученици од основите училишта Димитар Поп-Беровски, Мирче Ацев, Страшо Пинџур и Јоаким Крчовски.

„Во перформансот ‘Мене ништо не ми пречи’ учествуваат лица со интелектуална попреченост и лица со типичен развој како и професионални музичари и уметници кои ги водеа работилниците во изминатите 5 месеци чиј резултат е утрешниот настан. Музичките работилници ги водеше музичарот Дино Имери, а фотографските фотографот Благоја Блажевски“, се вели во најавата за настанот.

Ова е реализација на првиот дел од кампањата „Мене ништо не ми пречи“ после кој следуваат театарски работилници и театарски перформанс кој ќе го водат актерите Златко Митрески и Македонка Илиевска.

Проектот се реализира во соработка со Општина Ѓорче Петров и основните училишта во Ѓорче, ЦПЛИП – Порака Скопје и е поддржан од Општина Ѓорче Петров, Министерство за култура, Европската унија и Амбасадата на Полска.