„Лајка“ повика на вдомување кучиња и мачиња на Светскиот ден на бездомните животни

По повод 4-ти Април, Светскиот ден на бездомните животни, од ЈП „Лајка“ соопштија дека започнуваат кампања со цел подигање на свеста за подобрување на благосостојбата на бездомните животни и градење на култура за вдомување на бездомно животно.

„Од Секоја година ширум светот илјадници бездомни кучиња страдаат од глад, студ, ризик од топлотен удар, малтретирање, ризик од труење, појава на болест, смрт…“, напоменуваат од „Лајка“.

Од јавното претпријатие испратија и неколку совети до сите граѓани:

-да им обезбедат засолниште на своите маалски миленици;

-да постават садови за храна и вода на местата каде најчесто се стационираат бездомните животни во нивното маало;

-да донираат храна, ќебенца, поводници, околувратници и други дополнителни реквизити во некој локален шелтер;

-да дадат поддршка на здруженијата и организациите за заштита на животни;

-да вдомат бездомно животно (маче или куче);

„Како дел од оваа кампања ги покануваме сите љубители на кучиња, наши досегашни вдомувачи, пријатели, соработници и активисти да ни се приклучат на второто пролетно дружење со кучињата од прифатилиштето на ЈП „Лајка“, оваа сабота 9-ти Април 2022година, од 11:00 до 14:30 часот во Градскиот Парк во Скопје, збирно место Фонтана“, велат од „Лајка“

Оттаму информираа дека сите заинтересирани граѓани кои сакаат да шетаат некое од кучињата згрижени во „Лајка“, може да ги разгледаат на нивните социјални мрежи и да го одберат своето омилено со тоа што ќе се пријават на нивната мејл адреса: info@lajka.com.mk. Нивните вработени потоа ќе ви дадат одговор дали тоа куче е соодветно за да биде дел од нивната активност која ќе се спроведе овој викенд.