Во понеделник (12 мај) со почеток во 18 часот, во салата „Борис Трајковски“ на Саемот на книга, ќе се одржи јавна панел-дискусија на тема „Кој е авторот?“ – Авторство, интелектуална сопственост и иднината на креативноста во ера на вештачката интелигенција (ВИ).
Настанот го организираат здружението „ВИ Сега“ и Македонската асоцијација за интелигенција (МАИ), а има за цел да ја отвори јавната дебата за улогата на авторот и авторските права во време кога вештачката интелигенција активно учествува во создавање на содржини – од книги и статии, до музика, илустрации и преводи.
На панелот ќе учествуваат Сашка Цветковска – истражувачка новинарка и уредничка во Истражувачка репортерска лабораторија (ИРЛ), Марина Тунева – експертка за медиумска етика, Бојан Саздов – претседател на МАИ, Сеад Џигал – комуниколог и автор, Суад Сефери – основач на „ВИ Сега“ и автор на првата книга за ВИ на Балканот. Дискусијата ќе ја модерира Александра Тодоровиќ од „ВИ Сега“.
„Панелистите ќе дискутираат за правните и етичките димензии на генеративната ВИ, за можноста за ко-авторство помеѓу човек и алгоритам, одговорноста за содржина создадена од ВИ, и предизвиците пред кои се наоѓаат авторите во ова ново дигитално доба“, информираат организаторите.
Влезот е слободен за сите посетители на Саемот на книга.
