Второто издание на Маалски фестивал во организација на КСП Центар Јадро во петок (22 септември) официјално ќе биде отворено со книжевен бал и изложба на дела изработени на работилницата за креативно пишување за млади, „кЛИК, сЛИК – сподели кирилица“, под менторство на компаратистките Ивана Смилевска и Марија Бошковска.
„Без разлика дали ќе дојдете во тиква или во бела и раскошна кочија, во 19 часот ќе се запознаете со книжевни ликови создадени од тон имагинација на учесничките Маша, Мила, Мелиха, Анабела, Анастасија, Деспина, Теодора, Лара, Лејла, Сара и Сара (сѐ се женски). Самовили, Барбика од антика, Месечина што плаче, коса со супер-моќи… Се само дел од книжевните ликови, гости на балот, направени аналогно или со вештачка интелигенција преку непредвидливи кЛИКови и кирилични формули. Ликовите и нивните приказни се бројни и посебни, книжевно-имагинарни светови. Во нив ќе може да се влезе преку малите книгички – фанзини, кои споделуваат кирилица надвор од рамките на дигиталното објавување и комерцијалното издаваштво“, стои во најавата за настанот.
Учесничките ги изработија фанзините под менторство на уметниците Дарко Алексовски и Јован Јосифовски, преку сечење, лепење, цртање и колажирање.
„Што се фанзини? Мала книгичка, или фанзин е неофицијално издание создадено ентузијастички и панкерски, по „направи сам“ техника, а обработува одреден културен феномен, како на пример литературен или музички жанр. Фанзините се користат за споделување идеи и креативно изразување. Еве на пример, ние пишувавме за чувства“, се додава во најавата.
За музичкиот дел од настанот ќе се погрижат диџеите Индог и Мартина Пенева.
Дводневната работилница за креативно пишување за млади „кЛИК, сЛИК – сподели кирилица“ е поддржана од Министерството за култура преку конкурсот „Цртај на кирилица“. Маалски фестивал е под покровителство на Асоцијација Јадро, Општина Центар и Министерство за култура.
