„Шехерезада во диско“ – одржана работилница за креативно пишување во КСП Центар „Јадро“

Средношколци од повеќе средни училишта од Скопје учествуваа на дводневната работилница за креативно пишување за млади, што се одржа во КСП Центар „Јадро“ под менторство на компаратистките Марија Бошковска и Ивана Смилевска.

Во првиот ден од работилницата учесниците „прелетаа“ преку книжевните периоди – од антика до постмодернизам, читајќи митови, фолклор, поезија и мемиња.

„На вториот ден од работилницата повеќе пишувавме, а помалку бришевме, па слушнавме и што се случува кога мртвиот Кристофер Колумбо ќе отиде на Марс, кога ќе се вљубат Реџина Џорџ и Реџеп од Арачиново, но и кога Шехерезада нема да може да прекине да ика во диско. Го скршивме и Јајцето, каде откривме цел универзум, па патувавме до ѕвездите со Урсула К. Ле Гвин“, истакнуваат менторките.

Работилницата „Пиши-бриши… Само не оставај на seen“ се одвиваше на 5 и 6 јуни.