Руската независна телевизиска станица „Дожд“ доби петгодишна дозвола за емитување од Холандската управа за медиуми, се вели во соопштението на веб-страницата на регулаторот, јавува Евроњуз.
Ова следи по одлуката на Латвија да ја укине лиценцата на каналот на почетокот на декември, откако компанијата беше означена како закана за националната безбедност.
Либерално-наклонетата телевизиска станица се префрли со емитување од Латвија и други земји во јули, откако беше принудена да го затвори своето московско студио по руската инвазија на Украина.
Каналот престана да се емитува во Латвија, Естонија и Литванија на 8 декември.
Холандската дозвола, од 22 декември, ќе „обезбеди комерцијална телевизиска радиодифузна услуга како комерцијална медиумска институција“, соопшти регулаторот.
Не е јасно кога е објавено соопштението. Според рускиот веб-сајт „Медуза“, со седиште во Латвија, првите вести за дозволата се појавија во холандските медиуми во понеделникот.
Латвискиот јавен радиодифузен сервис (ЛСМ) истакна дека лиценцата се очекува да дозволи телевизијата „Дожд“ да ја емитува својата содржина на кабелските мрежи во сите земји на Европската Унија, вклучително и Латвија.
Телевизијата беше под лупа на латвиските електронски медиумски власти (НЕПЛП) поради нејзиното известување за војната во Украина. Во еден случај, водител наводно сочуствувал со маките на руските војници и оставил впечаток дека треба да се собере помош за нив.
На 2 декември, НЕПЛП ѝ изрече на телевизијата казна од 10.000 евра за две прекршувања, мапирање на Крим како дел од Русија и нарекување на руската армија како „наша армија“. Самата телевизија ги отфрли обвинувањата како „неправедни“ и „апсурдни“.
