Секоја есен, милиони пеперутки монарх тргнуваат на едно од најневеројатните патувања во природата, прелетувајќи повеќе од 3.000 километри – од полињата во Канада до шумите во Мексико, каде што ја поминуваат зимата. Оваа спектакуларна миграција привлекува голем број туристи од целиот свет.
Со приближувањето на крајот на зимата, пеперутките повторно летаат кон север, во Соединетите Американски Држави, каде што полагаат јајца на растенијата од кои зависат нивните идни генерации.
Иако со години успешно се спротивставуваат на климатските промени, губењето на живеалиштата, екстремните временски услови и зголемената употреба на пестициди, сега се соочуваат со нова, посуптилна закана – намалениот квалитет на цветниот нектар.
Истражување спроведено од научници од Универзитетот во Отава, објавено во списанието Global Change Biology Communications, покажува дека дури и минимално зголемување на температурата од 0,6 °C е доволно за значително да се намали хранливата вредност на нектарот.
Пеперутките кои се хранеле со нектар од „загреани“ цветови имале за околу 25 отсто помалку телесни масти, иако јаделе исто количество. „Затоплувањето го прави нектарот помалку хранлив и пеперутките не можат да го надоместат тоа“, изјави професорката Хедер Каруба.
Научниците предупредуваат дека климатските промени индиректно ги загрозуваат опрашувачите и повикуваат на поголема заштита на пеперутките монарх и нивните природни живеалишта.
Извор: EURONEWS / Фото: Википедиа
