Стотици граѓани синоќа протестираа во повеќе градови во Бугарија поради бруталното убиството на новинарката Викторија Маринова во градот Русе.
Демонстрантите во Софија носеа транспаренти со написи: „Ако нема правда, нема мир“ и „Митото убива“ и побараа брзо откривање на сторителите на злосторот. Покрај во главниот град, бдеења и протести се одржаа и во Русе, Пловдив, Јамбол и Стара Загора.
ФОТО: БТВ
Бугарскиот државен обвинител Сотир Кацаров вчера изјави дека властите немаат нови индиции за мотивите за силување и убиство на Маринова, предупредувајќи дека во оваа фаза од истрагата е потребна претпазливост.
„Во оваа фаза мора да бидеме внимателни, не затоа што немаме што да кажеме, туку затоа што секој непрецизно изговорен збор може да ја загрози нашата работа. Едно е сигурно – нападот беше екстремно брутален и исклучително монструозен“, рекол Кацаров.
30 годишната бугарска новинарка Викторија Маринова во саботата беше брутално претепана, силувана и задавена во Русе, северна Бугарија, а нејзиното тело беше пронајдено во паркот во близина на реката Дунав.
Маринова беше новинар и уредник на бугарската телевизија ТВН и известуваше за истрага за наводна корупција поврзана со фондовите на ЕУ.
* Оваа содржина е изработена со помош на Европската Унија во рамките на Проектот за
младинско изразување. За објавените содржини е одговорен Младински образовен форум и
истите нужно не ги одразуваат ставовите на Европската Унија.