Во соработка со Францускиот институт во Скопје, годинашниот Конкурс за најдобар фил(м)ософски есеј ќе биде посветен на култниот филм „Омраза“ (1995), во режија на Матe Касовиц.
Темата на конкурсот гласи: „Анатомија на еден пад: ‘Засега е добро…’ или зошто одбиваме да го гледаме распадот околу нас?“
Во рамките на активностите, на 9 април 2025 година во КИЦ – Скопје ќе се одржи проекција на филмот (17:30 часот), наменета за ученици од средните училишта од Скопје и од други градови. По проекцијата ќе следува краток вовед во темата од м-р Виктор Јованоски, а видеото од воведот ќе биде достапно и онлајн.
Учениците, под менторство на наставниците, имаат рок до 4 мај да ги испратат своите анонимни есеи на адресата: svl@philosophicalfilmfestival.mk. Пристигнатите трудови ќе ги оценува тричлена стручна комисија.
Свеченото доделување на наградите ќе се одржи на 26 мај во Свечената сала на Филозофскиот факултет – Скопје (11 часот). Најдобрите тројца ученици ќе добијат едногодишна стипендија од Интернационалниот универзитет „Европа Прима“ – Скопје, финансиски награди, подароци од Францускиот институт, комплети филозофска литература и списанија од издавачката куќа „Аз-Буки“ и од Филозофското друштво на Македонија, како и сертификат за освоено место и за менторство.
Победничкиот есеј ќе биде објавен во списанието „Филозофска трибина“.
