Петдневна, интензивна стимулација на мозокот би можела да донесе олеснување од депресија за кое досега беа потребни шест недели третман.
Еднонеделна, високофреквентна верзија на транскранијалната магнетна стимулација (TMS) може да биде речиси подеднакво ефикасна како стандардниот шестнеделен протокол, покажува студија на Универзитет на Калифорнија во Лос Анџелес. Пациенти кои примале пет сесии дневно во текот на пет дена пријавиле значително намалување на симптомите, споредливо со традиционалниот третман.
Истражувањето опфатило 175 лица со депресија отпорна на терапија. Од нив, 135 биле третирани со стандардна шема – една сесија дневно, пет дена во неделата, во период од шест недели. Останатите 40 пациенти биле вклучени во забрзан формат со пет сесии дневно во текот на пет последователни дена. И двете групи покажале значително намалување на симптомите, без статистички значајна разлика во вкупните резултати.
TMS е неинвазивна метода што користи магнетни импулси за стимулација на делови од мозокот поврзани со расположението и најчесто се применува кај пациенти кај кои антидепресивите не даваат резултат. Досегашните истражувања покажуваат дека 60–70% од пациентите имаат подобрување, а кај 25–35% се постигнува ремисија.
Интересно е што дел од пациентите во забрзаната група не почувствувале веднаш подобрување, но по две до четири недели покажале просечно намалување на симптомите од 36%. Сепак, научниците предупредуваат дека се потребни поголеми и контролирани клинички испитувања за целосна потврда на резултатите.
Извор: Science Daily /Фото: newsroom.uhc.com (Архива)
