Во книжарницата „ИЛИ-ИЛИ“, утревечер (10 јули) со почеток во 19 часот ќе се одржи промоција на книгата „Од личност до маска – за новата нормалност“, прва книга на Влатко Деловски која ќе биде пропратена со настап на „Второ колено“.
На промоцијата ќе зборува проф. д-р Дејан Донев, а присутните ќе уживаат и во свежите музички креации на „captatio benevolentiae“ со „Второ колено“ – Дејан Петровиќ (Чапс) вокал и гитара и Пеце Трајковски (Брада) на перкусии и хармоника.
Авторот ги поканува, како што вели, љубителите на философија, есеистика, личности и маски, на спонтано дружење „после горештините“ да ја претстави својата непретенциозна книга и да уживаат заедно во убавата мисла.
Влатко Деловски е роден во Битола, а потекнува од моштенскиот ареал на Пелагонија. Од Градежен факултет заминал да студира на Институтот за етнологија и антропологија при ПМФ каде дипломирал, подоцна магистрира на Институтот за македонска литература во Скопје на тема: „Културолошки параметри во првата канонизација на светители за МПЦ-ОА“. Во моментов е на докторски студии на ИМЛ при УКИМ. Директор е на НУМ Смилевски конгрес – Смилево. Но, работи и како консултант – надворешен научен соработник при Бигорскиот манастир „Св.Јован Крстител“. Влатко е сопруг, татко на две деца, активен качувач на карпи и планинар, велосипедист и сл.
„Второ колено“ се всушност скратена формација од „Трето колено“, музичко трио кое недомана ја претстави својата авторска музика, а во полн состав членуваат Дејан Петровиќ – Чапе: вокал и гитара, Дејан Марковски – Деки: вокал и гитара, Пеце Трајковски – Брада: перкусии и хармоника.
