ЗНМ и ССНМ го осудија бркањето новинари од Уставниот суд

Здружението на новинарите на Македонија (ЗНМ) го осуди третирањето на новинарите во Уставниот суд, кои на дрзок начин биле испратени надвор од зградата од вработените во Судот.

„Здружението на новинарите на Македонија го осудува однесувањето на вработените во Уставниот суд кои на недозволив и неевропски начин ги третираа новинарските екипи кои сакаа да ја проследат денешната средба меѓу претседателот на Уставниот суд, Сали Мурати и амбасадорот на ЕУ во Скопје, Самуел Жбогар. И покрај тоа што медиумите уредно биле поканети за да ја проследат средбата, на новинарските екипи им било дозволено само да снимат неколку инсерти, а потоа биле избркани од зградата на Судот. Иако во просториите на Уставниот суд има просторија која е предвидена за новинари, вработените во Судот на дрзок начин ги испратиле новинарите надвор од зградата и ги известиле дека изјави за средбата ќе можат да се земат само надвор од зградата. Овој инцидент е дополнително недозволив кога се знае дека токму Уставниот суд е оној кој треба да биде главен заштитник на слободата на говорот. Го повикуваме Судот во иднина да обезбеди достојни услови за работа на новинарите и да не поставува негативен пример во општеството за односот институција – новинари“, соопштија од ЗНМ.

Постапката на вработените во Уставниот суд ја осуди и Самостојниот синдикат на новинарите и на медиумските работници (ССНМ).

„Овој преседан е жесток удар врз правото на граѓаните преку медиумите да се информираат за најактуелните проблеми што директно ги засегаат. Дополнително, институцијата што треба да биде меѓу најугледните во едно демократско општество со овој потег создава лоша пракса на нетранспарентност којашто може да ја следат и другите“, велат од ССНМ.

Од Синдикатот додаваат и дека се надеваат дека ова ќе остане изолиран инцидент и апелираат до Уставниот суд во иднина да не дозволи да се случи ваков или сличен преседан.