Здружението „Зелена алтернатива“ на крај на месец јуни повторно ќе организира јавен настан на кој присутните отворено ќе зборуваат, прашуваат, дискутираат и ќе се информираат за лековитото дејство на канабисот.
По трите одржани семинари со предавања од познати доктори, активисти и истражувачи од целиот свет, овој пат настанот на „Зелена алтернатива“ е замислен како една голема јавна дебата. Настанот е отворен за сите кои секојдневно користат, се лекуваат, препишуваат и произведуваат екстракти од канабис.
Сите заедно да дадат придонес. И храбри пациенти со свои приказни, и докторите да посочат секојдневни проблеми при препишување на лекот. Притоа, заедно да се изнајдат соодветни механизми и решенија за институционални препреки, за достапноста на канабисот, концентрациите, за разните начини на употреба и помошта за луѓето со разни здравствени состојби, канцер, епилепсија, мултиплекс склероза…
Од изминатите семинари на „Зелена алтернатива“
„Целта е да секој да си ги каже своите искуства, да се споделат важни податоци, да се отстранат сите дилеми околу канабисот, а истовремено и да се зајакне довербата меѓу пациентите и лекарската фела“, велат од „Зелена алтернатива“ за Радио МОФ.
Засега е потврдено дека ќе присуствуваат докторите Лумир Ондреј Хануш од Израел, Пол Хорнби од Канада и Роберт Меламед од Колорадо. Сите ќе бидат вклучени во дискусиите со активистите, пациентите и лекарите.
„Во моментов се бара локација и преведувачи, и кој сака е добредојден да помогне волонтерски или финансиски“, велат од „Зелена алтернатива“.
Б.Ш.