Четвртото издание на „Youth Festival Strumica“ ќе се случи на 10 август во градскиот парк во Струмица. Под мотото „Urban Edition – Street Style Edition“ (Урбана едиција – уличен стил), фестивалот оваа година нуди поинаква програма која ќе го претвори градскиот парк во динамична сцена на уметност, музика, едукативни содржини и автентична урбана атмосфера.
„Од 18 часот до полноќ, младите ќе можат да учествуваат и уживаат во графити работилници во живо со уметниците од Форма Куманово, интерактивна DJ сесија со DJ Кискинов, каде младите ќе се запознаат со основите на диџејството, DIY зона за винтиџ облека, каде што ќе можат сами да креираат уникатни парчиња, скејт креативки со можност за персонализација на скејт опрема, фото-инсталација „All Eyes on Me“ како простор за креативни фотографии и интеракција на социјалните мрежи, Chill-зони наменети за одмор, дружење и уживање во атмосферата“, се вели во соопштението.
Фестивалот ќе има и едукативен дел, каде „Discover Serbia“ ќе ја предводи „Green Corner“ зоната со активности за одржливост и екологија, Црвениот крст ќе понуди информации за здравствена и безбедносна превенција на фестивали, а на информативните штандови на „Новус“, „Europe House Strumica“ и Обединетите Нации, младите ќе добијат информации за тековни програми, иницијативи и можности за активна вклученост.
„’Youth Festival Strumica 2025’ е бесплатен и отворен за сите – создаден од млади, за млади“, поентираат организаторите.
Настанот го организираат Центарот за истражување и анализи „Новус“ и „Europe House Strumica“, со поддршка од Обединетите Нации.
