ВМРО-ДПМНЕ денеска преку соопштение реагираше на прес-конференцијата на министерот за внатрешни работи Оливер Спасовски, кој потенцираше дека во однос на собраниските насилни настани од 27 април утврдиле пропусти во процедурите, системски недоследности и дисфункционалности кај одредени органи во МВР. За ВМРО-ДПМНЕ прес-конфеенцијата е врв на лицемерието и двојните аршини.
Според нив, против полициските службеници кои не примениле сила при демолирањето, палењето и ограбувањето на канцеларијата на Претседателот на Република Македонија немаше никаква постапка, а против полицајците кои на 27 април кои постапиле на истиот начин сега се водат постапки.
„ВМРО-ДПМНЕ јасно го кажа својот став во врска со случувањата од 27 април. На физичкото насилство му претходеше политичко насилство. Одговорност мора да има и за политичкото насилство“, велат од опозициската партија.
Тие во реакцијата бараат од Јавното обвинителство да не подлегнува на притисоците и заканите од СДСМ и да продолжи да постапува професионално, согласно Уставот и законите.
Според нив, барањата на Зоран Заев за смена на републичкиот Јавен обвинител со цел „прикривање на сопствениот криминал и инсталирање на послушник кој ќе ги спроведува наредбите за политички прогон на неговите неистомисленици“.