Со одлука на Влада денеска се донесени измени и дополнувања на Законот за заштита на децата со кои се зголемува износот на посебниот додаток за дете со специфични потреби коешто има пречки во телесниот или менталниот развој или комбинирани пречки во развојот до 26 години. Освен зголемувањето на сумата за посебен додаток, овие лица ќе бидат и здравствено осигурани, ако не се осигурани согласно со Закон.
Според предложените измени и дополнувања на Законот за заштита на децата, износот на додатокот се зголемува од 4.202 денари на 5.021 денари.
Исто така, самохраните родители коишто имаат дете со специфични потреби со пречки во телесниот или менталниот развој или комбинирани пречки во развојот до 26 години наместо досегашните 6.303 денари ќе добиваат сума од 7.351 денар. За материјално необезбедени родители, кои се корисници на социјална помош и постојана парична помош, а коишто имаат дете со специфична потреба до 26 години додатокот се зголемува од 5.252,50 денари на 6.276 денари.