Владата ја укина титулата национален уметник поради нерамноправен третман на уметниците

Владата на Република Македонија, на синоќешната седница го усвои Предлогот за престанување на важењето на Законот за националниот уметник на Република Македонија, којшто, како што се наведува во соопштението, предизвикува нерамноправен односи и третман на уметниците во Македонија.

На седницата била разгледана и усвоена информацијата за евалуацијата на проектите и програмите во Министерството за култура, во првата половина од годинава, при што е договорено Министерството за култура во рок од пет дена да побара вонредна ревизија од Државниот завод за ревизија.

Владината прес-служба денеска соопшти дека усвоен е и Предлогот за измени и дополнувања на Законот за културата по скратена постапка. Со измените, како што се посочува, ќе биде заштитен Буџетот на Македонија од штетните менаџерски договори на раководни лица во културните институции.

Според информацијата споделена на владината седница, штетите по Буџетот на Република Македонија по однос на постоечките менаџерски договори, според досегашните увиди, се во милијарди денари.

На седницата усвоен е и Предлогот за именување и дополнување на законот за употреба на македонскиот јазик со којшто во Македонија се враќа постапката за стекнување лиценца за лектори, прекината во 2013 година.