Поради стравот од предрасуди, во Македонија ниту едно лице со ХИВ не го споделува јавно својот статус. Здружението за поддршка на лица со ХИВ „Заедно Посилни“, одлучи да истражи колку од овој страв е основан. Наместо формално истражување, направи мал општествен експеримент, кој има за цел да допре до целата јавност.
„Ги ставивме луѓето во Градски парк во ситуација во која мислат дека имаат физички контакт со лице со ХИВ – млад дечко кој послужува кафе носеше маичка на која стои ‘Јас сум ХИВ позитивен’. Уште повеќе, вклучивме и учесничка која глуми дека е дел од редицата која чека кафе и потенцира дека лице со ХИВ служи пијалаци. Прашањето кое сакавме да го одговориме: Како ќе реагираат учесниците во ваква ситуација?
На наше големо задоволство, учесниците во целост го поддржаа нашиот шанкер и го одбранија од нападите упатени од глумицата, потенцирајќи дека ХИВ не се пренесува така и апелирајќи против предрасуди“, велат од здружението „Заедно сме посилни“.
Сите учесници во експериментот се случајни минувачи. Експериментот погледнете го на линкот подолу.