Голема меѓународна студија која опфатила повеќе од 1,8 милиони луѓе покажува дека вегетаријанската исхрана може да биде поврзана со помал ризик од неколку видови рак. Според резултатите, вегетаријанците имаат 21% помал ризик од рак на панкреасот, 12% помал ризик од рак на простата и 9% помал ризик од рак на дојка во споредба со луѓето кои јадат месо.
Овие карциноми заедно сочинуваат околу една петтина од смртните случаи од рак во Обединетото Кралство, пишува „Гардијан“.
Истражувањето покажува и 28% помал ризик од рак на бубрезите и 31% помал ризик од мултипен миелом кај луѓето кои се хранат вегетаријански.
Сепак, научниците забележале и некои спротивни резултати. Кај вегетаријанците е утврден речиси двојно поголем ризик од најчестиот тип рак на хранопроводот – сквамозен карцином, што можеби е поврзано со недостаток на одредени хранливи материи, како витамините од групата Б.
Дополнително, кај веганите е забележан околу 40% поголем ризик од рак на дебелото црево во споредба со луѓето кои јадат месо. Една од можните причини е понискиот внес на калциум и други важни нутриенти.
Истражувачите нагласуваат дека е потребно дополнително истражување за да се утврди дали намалениот ризик се должи на избегнувањето на месо или на специфични карактеристики на вегетаријанската исхрана.
Студијата анализирала податоци од луѓе со различни навики во исхраната – оние што јадат месо, живина, риба (пескетаријанци), вегетаријанци и вегани – кои биле следени во просек 16 години. Притоа биле земени предвид и други фактори кои влијаат на ризикот од рак, како телесната тежина и пушењето.
Експертите сметаат дека најдобриот пристап можеби е умерена исхрана со ограничена количина месо и риба, но со доволен внес на важни хранливи материи.
