Основните и средните училишта ќе одржат настава во сабота, на 11 ноември. Ќе се држат часовите за среда. Ова стои во одлуката на Министерството за образование и наука објавена во „Служебен весник“, а оваа сабота ќе биде последна што ќе се одработува до почетокот на зимскиот распуст.
„Законски и во согласност со наставната година, во оваа учебна година мора да има 180 работни денови. Бидејќи годинава зимскиот распуст ќе почне на 30 декември и ќе трае до 21 јануари, а летниот ќе почне на 9 јуни и ќе трае до 31 август, ќе мора да се одработат четири саботи – по две во секое полугодие“, известија од МОН на почетокот на школската година.