Бебињата стари само два месеца се способни да категоризираат различни објекти во својот мозок, што се случува многу порано отколку што досега се сметаше, покажува најново истражување на невронаучници од Тринити колеџот во Даблин.
„Родителите и научниците долго време се прашуваат што точно се случува во умот на бебето и што тие навистина гледаат додека го набљудуваат светот околу себе. Ова истражување го нагласува богатството на мозочните функции уште во првата година од животот“, изјави д-р Клиона О’Дорти.
Таа објаснува дека иако комуникацијата кај бебињата на оваа возраст е ограничена поради недостаток на говор и фина моторика, нивниот ум веќе не само што регистрира како изгледаат предметите, туку и разбира на која категорија припаѓаат.
„Ова покажува дека темелите на визуелната когниција се поставени многу рано“, додава таа.
Истражувачкиот тим, во соработка со болници во Даблин, вклучил 130 бебиња на возраст од два месеца. Лежечки на удобни перничиња и со слушалки за поништување бучава, бебињата гледале светли и шарени слики кои им го задржувале вниманието 15 до 20 минути.
Во тој период, научниците користеле функционална магнетна резонанца (fMRI) за да ги мерат обрасците на мозочна активност како одговор на слики од 12 вообичаени визуелни категории, меѓу кои мачка, птица, гумена патка, количка за пазарење и дрво.
Потоа биле користени модели на вештачка интелигенција за да се анализира начинот на кој мозокот на бебињата ги претставува овие категории, преку споредување на мозочната активност со моделите за визуелно препознавање.
Според раководителот на студијата, професорот Родри Касак, ова е најголемата лонгитудинална fMRI-студија спроведена на будни бебиња. „Податоците отвораат сосема нов начин за разбирање на тоа како бебињата размислуваат во најрана возраст, но и потенцијал за подобра рана дијагностика“, истакна тој.
Истражувањето е објавено во научното списание Nature Neuroscience.
Извор: The Dublin University / Фото извор: Pexels.com
