Тексас може да продолжи да ги забранува повеќето абортуси откако федералниот Апелационен суд го отфрли најновиот обид на администрацијата на Џо Бајден да го запре новиот закoн, кој стана најголемото ограничување на нацијата за абортус во последните 50 години, објави АП.
Вчерашната одлука може да го приближи законот до враќање на Врховниот суд на САД, кој веќе еднаш дозволи ограничувањата да стапат на сила без да се одлучува за неговата уставност. Законот во Тексас забранува абортуси откако ќе се открие срцева активност, обично околу шест недели и пред некои жени да знаат дека се бремени.
Откако законот стапи на сила во почетокот на септември, жените од Тексас бараа клиники за абортус во соседните држави, некои возеа неколку часа во текот на ноќта, вклучително и пациенти на возраст од 12 години. Законот не прави исклучок во случаи на силување или инцест.
„Се надеваме дека Министерството за правда итно ќе ја обжали одлуката до Врховниот суд и да ја врати можноста Тексашани да добијат грижа за абортус по шест недели во бременоста“, рече Брижит Амири, заменик директор на Проектот за репродуктивна слобода ACLU.
Министерството за правда не реагираше веднаш на одлуката, а портпаролот немаше коментар до вчера вечерта.
Во одлуката 2-1, тричлениот совет на 5-тиот американски Апелационен суд го одобри барањето на Тексас да го задржи законот во сила додека продолжува судскиот случај. Тоа е трет пат Апелациониот суд со конзервативна ориентација да застане на страната на Тексас и да ги остави ограничувањата.
Советот рече дека ќе ја забрза жалбата и ќе закаже усни расправи, но не кажа кога.
Канцеларијата на јавниот обвинител во Тексас ја нарече одлуката „доказ дека сме на вистинската страна на законот и животот“.
Тоа означува уште еден неуспех за Министерството за правда и давателите на абортус во Тексас во нивните напори да го изменат законот, кој досега преовладуваше поради уникатната структура што ја остава примената кај граѓаните. Секој што ќе поднесе успешна тужба против давател на абортус поради прекршување на законот, има право да бара отштета од најмалку 10.000 американски долари, што според администрацијата на Бајден изнесува награда.
Тексас имаше приближно дваесетина клиники за абортус пред да стапи на сила законот, а операторите велат дека некои можеби ќе бидат принудени да се затворат доколку ограничувањата останат во сила многу подолго.