Со театарската претстава „Супер Софи“, која синоќа беше прикажана пред деца со попреченост на сцената на Факултетот за драмски уметности, заврши хуманиот проект „Best Buddy“ кој имаше цел да ја подобра социјална инклузија на оваа ранлива група.
Претставата ја организираа Европската медицинска студентска асоцијација на Македонија (ЕМСА), заедно со студентите од Факултетот за Драмски Уметности при УКИМ и учениците во Детското драмско студио „Детски свет“.
„На претставата присуствуваа деца од повеќе институции во Скопје, и беше навистина огромно задоволство и успех. Во разговор со претседателот на ЕМСА, Тамара Ангеловска, дојдовме до идеја да се соедниме како студенти од различни факултети и да создадеме еден предновогодишен подарок за најмалите. Лично мене, овој проект ми беше од огромно искуство бидејќи за прв пат ми се пружи можноста да поставам мој текст и некоја моја фантазија на сцена и да застанам малку и зад кулисите. Задоволството беше мое, да се соработува со ЕМСА и се разбира со колегите од ФДУ кои го прифатија учеството како и помладите, се надевам, идни колеги од ДДС- Детски Свет, кои достојно и професионално го изработија она што им беше дадено за задача“, вели Изабела Јакимова, студент во втора година на Факултетот за драмски уметности која беше сценарист и режисер на претставата.
Европската Медицинска Студентска Асоцијација (ЕМСА) на Македонија функционира во рамки на Медицинскиот факултет во Скопје веќе 18 години, работи и организира над 25 тековни проекти опфаќајки теми од јавно здравје, медицинска едукација, медицинска наука и европска интеграција и култура. Во склоп на столбот Европска интеграција и култура се организира проектот “Best buddy”, проект наменет за децата со посебни потреби, со ментални или физички ограничувања, со цел подобра социјална инклузија на оваа ранлива група.
„Оваа година проектот се организира во соработка со Институтот за Дефектологија при Филозофскиот факултет на УКИМ, со кои по организираната обука за студентите на дефектологија и медицина, студентите ги посетуваа, едуцираа и се дружеа со децата од повеќе институции. Обуката беше одржана од страна на психијатар од „Заводот за ментално здравје“ и професор на Институтот за дефектологија, при што студентите беа обучени за соодветна комуникација и интеракција со оваа чувствителна група на деца“, објаснува претседателката на ЕМСА Македонија, Тамара Ангеловска.
За време на проектот беа посетени ДУЦОР „Партенија Зографски“, ДЦУ „Наум Охридски“ и здружението на граѓани „Во мојот свет“. На посетите студентите се дружеа со децата со интерактивни работилници прилагодени на нивната возраст. Беа одржани работилници за „Сексуално преносливи болести и како да се заштитиме“, работилници за изработка на слики и цртежи, изучување на песнички и други настани.
Од ЕМСА велат дека театарската претстава е симбол на крајот на проектот “Best Buddy” за оваа година, но и почеток и потсетник за сите граѓани за неизмерната важност на потребата за социјалната инклузија и интеграција на оваа ранлива категорија на деца во општеството. Тие додаваат дека овој проект ќе се проширува во иднина и дека ќе има можност да се опфатат што повеќе лица од различни категории за да го добијат вниманието кое го заслужуваат.