Паркот во скопската населба Капиштец вчера попладне бликаше од радост, преплавен со деца кои насликаа голем број цртежи на ликовната работилница организирана од локалната самоуправа.
Малите рачиња со дрвени и мрсни боички, темпери и фломастери ги сликаа своите фантазии и желби и веднаш ги изложуваа своите дела. Некои деца гордо ги гледаа и се фалеа со цртежите. Имаше цвеќиња, зајдисонца, дрва, куќи, автомобили, пушки, ликови од цртаните филмови, апстракции. Децата неуморно одеа од своите масички до масата каде имаа на располагање хартија, бои и сликарски прибор, земаа што им треба и брзо се враќаа, задлабочени и сериозни во своето творење. Насмевката беше универзална и кај малите и кај возрасните, како и впечатокот дека вакви настани им недостигаат на маалата низ Центар.
„Многу убаво се забавуваме, навистина поминуваме прекрасно и уникатно попладне. Убава е глетката да се видат толку многу деца на едно место, во заедничка игра“, вели една мајка.
Во паркот Капиштец беше и градоначалникот на Општина Центар, Саша Богдановиќ кој вели дека ќе продолжи да иницира вакви настани кои ги инспирираат децата на дружење, при што низ игра се остварува и едукативна цел, а од друга страна освен децата, се зближуваат и возрасните.
Ликовната работилница се одржа под слоганот „Остави го таблетот, симни се пред зграда“, со цел децата и родителите да се мотивираат што повеќе време да поминуваат надвор во игра, како некогаш, наместо да седат затворени дома пред таблет, телефон, компјутер или телевизор.
На децата вчера им асистираа и им помагаа студенти од Факултетот за ликовни уметности- Скопје. Следното дружење е закажано за следната среда, на 11 јули, кога на ред е музичка едукативна работилница. Предвидени се вкупно седум настани под слоганот „Остави го таблетот, симни се пред зграда“, кои ќе се одржат на три локации во општина Центар.