Средношколски пленум: Нов протестен марш во четврток во Скопје

Скопските средношколци на Генерален пленум одлучија повторно да излезат на протестен марш против лошите реформи во образованието, велат за Радио МОФ од Средношколски пленум.

„Во четврток, тоа нема да биде марш со кој ќе го прекинеме бојкотот на средношколците. Дали ќе продолжиме со бојкотот на наставата не зависи од нас, туку од министерот за образование и наука“, изјавија од Пленумот.

Иако во некои медиуми излезе информација дека маршот ќе се одржи во понеделник и со тоа ќе заврши бојкотот на средношколците, од Пленумот демантираат. Воедно, посочија дека бојкотот ќе продолжи додека не се одржи средба со ресорниот министер и не бидат исполнети нивните барања.

Средношколците постојано алармираат дека растат притисоци кон нив и нивните родители, меѓутоа тие во неколку наврати изјавија дека не се откажуваат од нивните барања. Од МОН пак, досега не излегоа со официјална покана за средба со претставници од Пленумот.

Барањата на средношколците се враќање на стариот концепт на државна матура, математиката да не биде задолжителна на државна матура, како и ставање во мирување на екстерното тестирање.

Во меѓувреме, бојкотот продолжува во средни училишта во Скопје, Тетово, Битола, Куманово и Охрид.