По повод 8ми Март, Денот на жената, Здружението за еднородителски семејства „Една Може!”, во соработка со Skopje City Mall, организираат солидарен базар. Базарот е сместен на вториот кат помеѓу киното и центарот за куглање.
На базарот ќе можат да се купат рачни изработки, уметнички дела и природна козметика изработени од членките на здружението. Купувајќи некој од производите се вреднува и поддржува трудот на членовите на оваа организација.
Здружението „Една може!“ – One can!, е доброволно, непрофитно, невладино, и непартиско здружение на граѓанки, самоиницијативно формирано со слободно здружување заради остварување на севкупна општествена грижа и третман на еднородителските семејни заедници и остварување на нивните економски, социјални, хуманитарни, здравствени, образовни и културни права.
„Согледувајќи ги потребите на членките и членовите на еднородителските семејства во земјава, се обединивме, си ја создадовме One can!, група за самопомош, пред неколку години, а во мај 2016та оформивме официјално Здружение за унапредување на правата на еднородителски семејства во земјава, Една може! – Скопје. Ова е пластичен пример за она што значи женска солидарност, а Skopje Citi Mall ни излезе во пресрет и стана дел од креирањето на посреќни приказни за еднородителските семејства во земјата“ изјави Дороти Пачкова, претседателка на здружението.
Организаторите ги повикуваат граѓаните да го посетат базарот и да купат некој од производите, со што ќе покажат свест и почит кон различностите, особено кон жената како столб на семејството.