Собранието го донесе Буџетот за 2023 година

Собранието на Република Северна Македонија вчера го усвои Дополнетиот предлог буџет за 2023 година, соопштија од Министерството за финансии (МФ), од каде додаваат дека тој значи справување со последиците од енергетската криза, поставување основи за економско заздравување и забрзување на економскиот раст и фискална одржливост.

Буџетот за 2023 година изнесува 324.8 милијарди денари, приходите се планирани на ниво од 282.1 милијарда денари, што е за 14.8% повисоко од 2022 година, притоа дефицитот е на ниво од 4.6% од планираниот БДП или 42.7 милијарди денари и истиот ќе се финансира од домашни и надворешни извори, велат од МФ. Проекцијата за економскиот раст за 2023 година пак, е 2.9%, а инфлацијата 7.1%.

Министерот за финансии Фатмир Бесими во Собранието истакна дека буџетот за 2023 година е реален и ги лоцира приоритетите и соодветно ги алоцира средствата на граѓаните и фирмите. Според него, со Буџетот се обезбедува заштита на стандардот на граѓаните, се унапредува квалитетот на живот, а истовремено се прави фискална консолидација и подобра контрола на трошењата.

„Предизвиците со кои се соочивме во 2021, 2022 ќе бидат присутни и во 2023 година. Затоа со овој Буџет, кој е најзначен документ што ги содржи сите мерки и политики за наредната година, ќе се даде поддршка за надминување на предизвиците од кризата и поддршка за поставување основа за економски раст“, рече Бесими.

Министерот додаде дека во оваа година имаше поконзервативен пристап во проектирањето и дека годината ќе се заврши со понизок дефицит од планираниот и дека и јавниот долг ќе биде под 60%, а средствата доделени за справување со енергетската криза, вели дека достигнале над 200 милиони евра.

„За следната година се планирани 240 милиони евра за справување со енергетската криза. Околу 800 милиони евра се за капитални инвестиции. При тоа 700 милиони евра се за финансирање на дефицитот, 850 милиони евра за стари задолжувања, при што ќе практикуваме модели за финансирање кои се со помал трошок, како што тоа беше пракса и оваа година“, посочи Бесими,  наведувајќи дека средствата за дефицитот се за капиталните инвестиции при што е значајно дека се менува структурата во проекти од енергетиката.

За капитални инвестиции во 2023 година се планирани 48.8 милијарди денари кои се за 51.8% повеќе во однос на планот за 2022 година, посочуваат од МФ.

„Тие се за интензивирање на реализација на инфраструктурните проекти, односно за инвестициски вложувања во патната и железничката инфраструктура, енергетската и комуналната инфраструктура, како и капитални инвестиции за подобрување на условите во здравствениот, образовниот и социјалниот систем, земјоделството, културата, спортот, заштитата на животната средина и правосудството“, велат од МФ.

„Во 2023 година со Буџетот се обезбедува 276,1 милијарда денари за редовна исплата на плати на вработените во јавниот сектор, навремена и редовна исплата на пензии, гарантиран минимален приход и останати социјални права, исплата на субвенции во земјоделството, поддршка на малите и средните претпријатија, поддршка и субвенционирање на иновативните активности, како и поддршка на енергетскиот сектор. Средствата за стоки и услуги се на исто ниво како во 2022 година, поточно во износ од 23,6 милијарди денари, а со нив се обезбедува финансирање на зголемените трошоци за енергија и транспорт и непречено функционирање на институциите. Во Буџетот се обезбедени 144,9 милијарди денари за социјални трансфери, односно за исплата на пензии 75 милијарди денари, за надоместоци за социјална заштита 12,7 милијарди денари, за здравствена заштита 42,1 милијарда денари и 26,7 милијарди денари се трансфери до единиците на локалната самоуправа, коишто се зголемени за 1,2 милијарди денари. Триста и седумдесет милиони денари во дополнетиот Предлог-буџет се обезбедени и за  субвенциониран студентски оброк за академската 2022-2023 година. Поради продолжување на кризата и за натамошна заштита на граѓаните и стопанството, во 2023 година се предвидени близу 14 милијарди денари за поддршка на граѓаните и компаниите“, додаваат од МФ.

Радио МОФ претходно анализираше што предвидува предлог буџетот за 2023 година, кој претходно беше усвоен од Владата.

Помалку пари за учениците, студентите и наука, а повеќе за плати – Што предвидува Предлог буџетот за 2023 [Инфографик]