„Скопје пред и по земјотресот“ – документарни филмови во Кинотека

Вечерва (1 октомври) со почеток во 20.00 часот во Кинотеката на Македонија ќе бидат проектирани документарни филмови за скопскиот земјотрес во 1963, создадени од македонски автори во годините по катастрофата. Ова е првиот дел од ваквата програма, која продолжува и во среда, во истото време, со уште неколку вакви филмови. Еве ја програмата за вторник:

„Средби на солидарноста“

Првата годишнина од катастрофалниот земјотрес од 26 јули 1963 година во Скопје е одбележана со положување венци и свежи цвеќиња на гробницата на загинатите во земјотресот. Во знак на сеќавање и благодарност на подадената рака и помош од целиот свет во Скопје е организирана „Средба на солидарноста“. На оваа манифестација, која од 1964 година станува традиционална, учествуваат културно-уметнички изведувачи од целиот свет.

документарен филм, Македонија
1964, 10 мин., црно-бел, 35 мм
режија и сценарио: Александар Ѓурчинов„Скопје на 26 јули 1963“

Само еден час по катастрофалниот земјотрес кој го запре животот во Скопје на 26 јули 1963 година, снимателите ги забележаа на филмските ленти сиот ужас и размерите на катастрофата. Следат и снимки за напорите на спасителите да ги извлечат повредените под урнатините, како и многубројните жртви за кои немаше спас. Помошта пристигнуваше од сите страни на светот. Во првите денови по катастрофата беше извршена евакуација на најмладите жители од градот.

документарен филм, Македонија
1963, 14 мин., црно-бел, 35 мм
режија и сценарио: Кочо Недков