Властите на шпанскиот остров Ибица донесоа одлука со која сите клубови кои работат на популарното одредиште за журки ќе мораат да затвораат во 6:30 часот. Одлуката ќе се спроведува од идната летна сезона, јавува локалниот весник El Diario De Ibiza.
Претседателот на островскиот Совет, Vicent Torres и градоначалниците на петте населени места на Ибица се сретнале вчера (21 октомври) за да дискутираат за работното време на бројните клубови. Се договориле сите дискотеки, меѓу кои се светски познатите „Pacha“, „DC-10“, „Sankeys“, „Amnesia“ и „Space“, да можат да работат најдолго до 6:30 часот секое утро. Властите најавија високи казни за клубовите кои нема да ја почитуваат забраната за работа по договореното време.
Изминатата сезона, биле забележани повеќе случаи на прекувремена работа на дискотеките на Ибица, а само Amnesia, според властите, 15 пати ги прекршила одредбите од лиценцата за работа. На забавата за затворање на сезоната, клубот работел до 13:00 часот, седум часа подолго од дозволеното.
Новите одредби ќе ги засегнат и помалите музички барови и баровите на плажите на Ибица. Кафе-баровите ќе мораат да затворат во 5:00 часот наутро, додека на плажите ќе може да работат само до полноќ. Претходно, малите барови во градот Ибица можеа да работат до 6:30 часот.