Шведска се подготвува да депортира 80 000 бегалци кои пристигнале минатата година и чии барања за азил се одбиени, соопшти министерот за внатрешни работи Андерс Игеман.
„Ние зборуваме за 60 000 луѓе, но бројката може да се качи и до 80 000“, изјави Игеман, додавајќи дека владата побарала од полицијата и надлежните за мигрантите да ја организираат нивната депортација.
Тој рече дека 45 отсто од барателите на азил биле одбиени, така што, според него, државата треба да биде спремна да врати десетици илјади бегалци од вкупно 163 000 кои побарале засолниште во Шведска минатата година.
Игеман најави дека депортацијата ќе биде направена со специјални чартер летови, а бидејќи се работи за голема бројка луѓе, се очекува да трае неколку години.
Германија и Шведска се државите со најголем број на баратели за азил. Министерот ја најави мерката, кога се очекува да пристигнат уште десетици илјади мигранти преку Грција, најчесто бегалци од конфликтот во Сирија, Ирак и Авганистан.
Според Обединетите Нации, повеќе од 46 000 бегалци пристигнале во Грција изминатиов месец, со повеќе од 170 луѓе кои загинале обидувајќи се да стигнат до грчките острови.
Шведска е дом на 9,8 милиони луѓе и една од европските земји која прифати најголем број бегалци во однос на бројот на жители. Во меѓувреме, властите во соседната држава Данска, изгласаа да им се конфискува злато и други вредни предмети на бегалците, со надеж дека ќе го намалат нивниот наплив.