На овогодинешните Eвропски филмски награди во Рејкјавик се случи уште една пловидба на филмот „Триаголник на тагата“, сатирата за луксузната јахта на Рубен Остлунд, која освои најдобар филм, како и три други главни награди.
Шведскиот режисер, кој брзо стана миленик на Европската филмска академија (ЕФА), ги зеде и признанијата за најдобар режисер и најдобар сценарист за да ги додаде на неговите шест европски награди за филмот „Квадрат“ во 2017 година.
„Сакам да ја посветам оваа награда на Чарлби Дин“, рече Остлунд во еден свој говор, потсетувајќи на покојната главна актерка и модел, која ненадејно почина во август на 32 години.
Хрватскиот актер ветеран Златко Буриќ беше прогласен за најдобар актер за неговата улога на руски магнат за вештачко ѓубриво, исто така во „Триаголник на тагата“.
Белгијката Вики Крипс ја доби наградата за европска актерка за нејзината изведба на царицата Елизабета од Австрија во „Корсаж“, во конкуренција со Пенелопе Круз и Леа Сејду. Крипс рече: „Сакам да им го посветам ова на сите жени кои треба да се видат и слушнат, кои треба да се ослободат и да залечат од овие длабоки, длабоки рани што ги носевме со генерации и кои треба да ги залечиме за да можат мажите и жените можат повторно да здружат“.
„Мариуполис 2“ ја доби наградата за документарен филм, која ја подигна ќерката на режисерот Мантас Кведаровичиус, кој беше убиен во Украина. Тоа беше најтрогателниот момент на вечерта.
„Тој загина во еден вид несебичност што повеќето од нас не можат да се надеваат дека ќе го постигнат – доставување лекови на луѓето. Се чувствувам многу среќна што имав некој толку брилијантен во мојот живот“, рече таа.
Еден од повпечатливите моменти на вечерта беше кога наградата за најдобра комедија му беше доделена на „Добриот шеф“, во кој глуми Хавиер Бардем. Продуцентот Жаум Рурес, очигледно невозбуден, рече: „Ви благодариме за оваа награда, иако ‘Добриот шеф’ е драма, а не комедија“. Режисерот Фернандо Леон де Араноа ја засили поентата, велејќи: „Веројатно ја доделивте европската награда за комедија на најсериозните луѓе во салата“.
Европско откритие – награда ФИПРЕСЦИ за најдобро деби доби „Мало тело“ на Лаура Самани, најдобар анимиран филм е „Забрането за кучиња и Италијани“ на Алан Угето, а „Сексуалниот живот на баба ми“ на Уршка Ѓукиќ и Емили Пигар е најдобар краток филм.