„Ролинг Стоунс“ ќе го објават нивниот прв студиски албум по 2005 година, „Хакни дајмондс“ (Hackney Dimonds).
Албумот, како што пишува „Би-Би-Си“ ќе биде промовиран вечерва на настан во Хакни, местото кое е во „срцето на новиот албум“. Настанот ќе го води Џими Фелон, а ќе се пренесува директно и на Јутјуб.
Засега се шпекулира дека во албумот гостуваат Пол Мекартни, Стиви Вондер и Лејди Гага.
Најавата за промоцијата следи по нивната рекламна кампања во која логото на бендот се појави на неколку значајни објекти во Њујорк, Лос Анџелес, Лондон, Париз и други поголеми градови.
„Нов албум, нова музика, нова ера“, пишуваше трејлерот за кампањата.
На денешната промоција треба да присуствуваат тројцата преостанати членови на бендот, Мик Џегер, Кит Ричардс и Рон Вуд.
Ова е нивниот прв студиски албум со оригинални песни од 2005 година. Во 2016 година „стоунси“ го објавија „Блу енд Лоусам“ (Blue & Lowsome) во кој имаше ковери на Литл Волтер и Хаулин Волф.
