Родителите се информираат за состојбата на учениците преку СМС

Интересот за користење на СМС услугата преку која родителите или старателите имаат можност еднаш неделно да добиваат известување за последните промени во образованието на нивните деца е зголемен за околу 50 отсто во изминатите четири месеци, од почетокот на активноста.

Родителите се информираат за состојбата на учениците преку СМС

Министерот за образование и наука Спиро Ристовски денеска информираше дека во ноември, првично биле испратени 143.345 СМС пораки, а неделава 212.690 на исто толку оставени телефонски броеви. Во однос на јазикот, на кој се испратени пораките, 170.780 се на македонски, 40.324 на албански и 1.586 на турски јазик, пренесе МИА.

– Родителите и старателите го практикуваат овој начин на информирање за состојбите на нивните деца во училиште и повеќе не се чекаат само родителските средби. Според раководствата на училиштата, тие ги интензивираат посетите и средбите со класните раководители и другите наставници, односно при секоја поважна промена остваруваат непосреден контакт за да се информираат за се што ги интересира поврзано со нивните деца – ученици, рече Ристовски.

Од 1 ноември од кога стартуваше овој процес, Ристовски информира дека биле вршени редовни инспекциски надзори од просветниот инспекторат.

– Извршени се 422 инспекциски надзори во 282 основни и 140 средни училишта. Донесени се 21 решение за отстранување недостаток по кое се поставува во рок од осум дена. По сите е постапено од страна на наставниците и нема ниту еден поднесок до суд, истакна Ристовски.