По барање на публиката, Колектив Ветерница ја најави третата изведба на претставата „Робоград“, во Младински културен центар, Кино Фросина која ќе се игра во среда (14 март).
„Робоград“ е танцова претстава од деца за деца која раскажува за еден град кој ги претставува сите градови на светот и карактерите кои живеат во нив односно брзањето, рутината и оттуѓувањето наспроти спонтаноста, љубопитноста и соживотот. Претставата е приказна за нашето време, односно невербален театар кој дрско ја отелотворува важноста на слободната игра бидејќи само таа може да го спаси светот.
„Таа ниту се купува, ниту се продава – играта ја носиме во себе и во неа сме сите еднакви! Затоа, дојдете да си играме!“, порачуваат од Ветерница.
Претставата почнува во 19:30 часот, а цената на билетот е 100 денари.