Македонската опера и балет го најавува бисерот на оперската уметност – „Риголето“, едно од најголемите и најсилни оперски ремек-дела на таткото на операта – великанот Џузепе Верди. Претставата ќе се игра на 15 март, со почеток во 20:00 часот.
„Риголето“ е драма на човечкиот живот која јасно, силно и емотивно ги прикажува скриените негативни карактеристики кај луѓето кои ги потиснуваат љубовта, слободата, радоста…
Трагична приказна за љубомора, одмазда и жртва. Напишана според драмата на Виктор Иго „Кралот се забавува“, „Риголето“ како опера е раскажана со возбудлив музички јазик и нејзиниот успех наназад низ историјата не се должи само на либретото, на трагичната судбина на насловниот лик, туку уште повеќе на прекрасните арии меѓу кои и (“La Donna è mobile”), и на воопшто, убавата мелодиска структура.
Диригент е Бисера Чадловска, а режисер Нина Најденова. Во улогата на Риголето настапува Ристе Велков, Џилда е Наде Талевска-Спасовска, а војводата од Мантова е Зоран Сотиров. Настапуваат хорот и оркестарот на МОБ.