Сечата на две возрасни тополи во Карпош 4, утрово ги изреволтира граѓаните и жителите на оваа скопска населба. Тие на социјалните мрежи поставија слики и видео материјали од сечењето на дрвата на улица „Волгоградска“, изненадени од мотивот за ваквиот чин.
Зеленилото во Карпош pic.twitter.com/mMAb4Gud6q
— Nevena (@buzaroska) May 10, 2018
Во документот кој бил приложен на граѓаните, а кој е објавен на социјалните мрежи, одобрението е издадено од Градоначалникот на Град Скопје, по барање на граѓанин, за сечење на седум дрва и кастрење на 21 дрво. Образложението на одлуката е дека по увид на стручни лица било утврдено дека дрвата за сечење се стари, со суви стебла и кршливи гранки и постои опасност да паднат и да предизвикаат материјална штета.
Граѓаните изразија сомнеж во образложението, посочувајќи дека од фотографиите се гледа дека станува збор за здрави дрва.
Градоначалникот на Општина Карпош, Стефан Богоев, информираше дека тој не дал налог за сеча на дрвата, додавајќи дека на постоечката локација не е предвидена изведба на било каква инфраструктура или градежни активности, откако дел од граѓаните на социјалните мрежи шпекулираа дека сечењето на дрвата е поради поставување на цевки.
Во Општина Карпош по барање на граѓани од околните згради, а по налог на Град Скопје, ЈП Паркови и зеленило, исече две тополи. Ова е сторено, по претходно утврдени испитувања за состојбата на двете дрва 1/2
— Стефан Богоев (@sbogoev) May 10, 2018
Општина Карпош нема издадено налог за сеча на дрвата во Карпош 4, а освен тоа, што е позначајно, на постоечката локација не е предвидена изведба на било каква инфраструктура или градежни активности 2/2
— Стефан Богоев (@sbogoev) May 10, 2018
Во текот на денот преку соопштение реагираа и од Град Скопје:
„Сакаме да ја информираме јавноста дека овие дрвја и во минатото предизвикуваа опасност и штета, а пред неколку години поголеми гранки кршејќи се предизвикаа поголема материјална штета на паркираните возила. За овој (и сите слични случаи), беше поведена судска постапка, и притоа јавното претпријатие „Паркови и зеленило“ мораше да исплати средства и да ја надомести нанесената штета. Град Скопје сака да истакне дека, како и досега, за секое исечено дрво, на истата локација или во непосредна близина ќе биде засадено ново дрво“, стои во соопштението на Град Скопје.