Во осум градови низ Македонија, од денеска до 28 септември, ќе се одржи Ревија на европски филмови информираат од Асоцијацијата на филмски професионалци и ТВ соработници на Македонија (АФПМ), кои го спроведуваат проектот.
Од Асоцијацијата информираат дека љубителите на филмската уметност во Струга, Прилеп, Кичево, Битола, Кавадарци, Штип, Неготино и Радовиш ќе имаат можност да се забавуваат и да уживаат во два филма од изборот на квалитетни филмски остварувања од најновата европска продукција. На годинашната ревија ќе бидат прикажани филмови од Италија, Швајцарија, Германија, Холандија, Русија и други земји.
„Со овој проект ќе бидат претставени повеќе европски филмови со цел да ги доближиме квалитетните и репрезентативни филмови од неколку големи европски кинематографии, кои се учесници и добитници на светските филмски фестивали. Станува збор за проекции на репрезентативни филмски наслови“, соопштија од АФПМ.
Проектот е поддржан во рамките на манифестацијата „Нов културен бран“ на Министерството за култура на Р.М.