Регистрирани нови 18 случаи на заразени со коронавирус, бројката се искачи на 219 лица

Преку соопштение, Министерството за здравство информира дека до изминатите 24 часа се регистрирани нови 18 случаи на коронавирус во државава, и тоа 11 во Скопје, четири во Прилеп, два во Куманово и еден во Тетово. Со ова, бројката на заболени до 12 часот изнесува 219 лица.

Според местото на живеење, пак, досега случаи на Ковид-19 се регистрирани во Скопје каде има 134 случаи, Дебар со 43 случаи, Куманово со 17, Штип со осум, Прилеп со шест, Охрид и Велес со три случаи, два во Кавадарци и Тетово и еден случај во Гостивар.

Вчера пак, министерот за здравство Венко Филипче најави дека од следната недела ќе почнат и мобилни тестирања за коронавирус, каде ќе бидат селектирани пошироки групи на граѓани, согласно мислењето на епидемиолозите.

На територијата на државата од 18 март веќе е прогласена вонредна состојба, а неколку денови веќе контиунирано се спроведува полициски час кој трае од 21 до 5 часот. Дополнително донесена е одлука за рестрикција на движењето за граѓаните над 67 години за кои е забрането движење од 11 па се до 5 часот, но и за младите до 18 години за кои полицискиот час почнува во 21, а завршува во 12 часот наредниот ден.

Пред два дена, донесена е одлука и за проширување на полицискиот час за време на викендот каде тој ќе започнува во 16 часот.