Дваесеттото, јубилејно издание на фестивалот Мелт (Melt Festival) годинава ќе се одржува на 14, 15, 16 јули кога се најавува извонредна роденденска програма. Како ѕвезди на фестивалот за оваа година се најавени Bonobo, Die Antwoord, M.I.A, The Kills, Soulwax, Hercules & Love Affair.
Ова секако е само мал дел од концертите што ќе се случуваат за време на германскиот фестивал од каде за прв пат ќе известува тимот на Радио МОФ.
Melt! важи за еден од најголемите фестивали на електронска музика, а се одржува во реонот Ферополис, на пола пат меѓу Берлин и Лајпциг. Првото издание е организирано во 1997 година, како мал фестивал на електронска музика. По неколку години популарноста вртоглаво расте, па Мелт се префрла на неговата моментална локација.
Токму Ферополис, или „ Железниот град“ се смета дека има голема заслуга за растечката популарност на овој фестивал. Станува збор за поранешен рудник кој е претворен во музеј на отворено и е домаќин на различни културни манифестации меѓу кои и Melt! Гигантските машини, езерото Гремин, околната шума и седумте фестувалски сцени се исполнети со светски познати артисти што создаваат уникатната атмосфера.
Уште во раните години Мелт негувал блиска врска со берлинската клубска сцена, со настапувачи како Ellen Allien, Dixon, Richie Hawtin, но со тек на годините програмата на фестивалот освен електронска музика почнува да вклучува и светски познати изведувачи од хипхоп и алтернативната рок сцена.
Меѓу нив, на сцената на Melt! се и Björk, Oasis, Portishead, Aphex Twin, Atoms For Peace, Alt-J, Massive Attack, Pet Shop Boys, Hurts, The xx, Moderat, Kings of Convenience, Tame Impala, Bonaparte, Foals, Franz Ferdinand, Two Door Cinema Club, Underworld, Robyn, Lana Del Rey, Bloc Party, Giorgio Moroder, Disclosure, Jónsi, Maximo Park, M83, Scissor Sisters, La Roux, Austra, Chet Faker, Django Django, Travis, Röyksopp, Editors, Kate Nash, The Streets, Gossip, Kelis, Hot Chip, dEUS, Roisin Murphy, Skepta.
Целосната програма на фестивалот како и информации за влезници за фестивалот може да се најдат на официјалната страница на фестивалот Мeltfestival.de.