„Работам на илустрации за деца затоа што ја сакам нивната имагинација“

Ангела Конеска е илустраторка и сликарка која изминативе четири години професионално се занимава со дигитална илустрација. Таа е студентка на Факултетот за ликовни уметности на отсекот сликарство, но својата најголема пасија ја пронајдува во дигиталната уметност, особено во илустрациите за деца.

„Работам за студиото Bright Jungle кое е лоцирано во Скопје веќе неколку години, имав можност да работам на многу проекти кои вклучуваат илустративна работа, но и анимација“, раскажува таа за Радио МОФ.

За инспирација ѝ служат илустратори, карактер дизајнери и аниматори како: Aaron Blaise, Jason Deamer И Brittney Lee. Но, за Конеска инспирација се и нејзините колеги од студиото со кои соработува.

Во илустрациите на Конеска се забележува разиграност и автентични приказни кои како што истакнува самата, некогаш може да бидат фантастични и нереални, но секогаш инспирирани од креативниот и колоритен свет на децата.

„Ги сакам можностите кои ги даваат дигиталните медиуми на кои работам и тоа што секогаш може да се научи нешто ново. Се обидувам да оставам свој печат и препознатливост, но исто така сакам да експериментирам и да се надоградувам. Најчесто работам на илустрации за деца затоа што ја сакам нивната имагинација“, вели таа.

Инаку, кога не работи на дигитална илустрација, сака да сликам со масло на платно кое како што посочи, скоро секогаш е во правец на надреализмот.

Конеска е уште една илустраторка која се приклучува на нашата иницијатива #ИнстаИлустрации. Во продолжение, погледнете дел од нејзините илустрации:

View this post on Instagram

A post shared by Angela Koneska (@_angelakoneska_)

МОЖЕ ЌЕ ВЕ ИНТЕРЕСИРА