Вечерва (6 декември) во Гостивар, ќе биде промовирана новата стихозбирка на поетесата Љупка Антеска, под наслов „Отвори ги очите“. Творбите во книгата се поделени во три циклуси: „Поезијо, остави ме“, „Љубов потпрена на патерици“ и „(Мо)ментални (за)белешки“.
Настанот ќе се одржи во Центарот за млади и заедницата, со почеток во 18.30 часот. Промотори се: Снежена Стојчевска и Цветанка Колева, додека стихови од збирката ќе чита Катерина Гогова.
„Повеќето песни од книгава Отвори ги очите зрачат со извесна самосвесност на поетесата, самосвест за себе како творец и за песната како творба која има свои правила, свој начин да биде, свој начин да заведе и да се запомни. Поетесата знае како, од време на време, во точно одреден миг, да проблесне со некоја идеја, со некоја подробност која објаснува некоја суштина, па тие проблесоци на дребноста при набљудувањето и опишувањето на нештата во животот и живеачката, делуваат симпатично, пријателски, атрактивно, ведро, човечно“, пишува во поговорот на збирката, академик Катица Ќулавкова.
Љупка Антеска е родена 1980 година во Струмица. Живее и работи во Гостивар, како новинар. Претходно ги има издадено стихозбирките: „Денодение“ и „Лек за времето“.