Промоција на романот „18% сиво“ од Захари Карабашлиев вечерва во МКЦ

Во рамки на првиот Фестивал на европската литература, „BookStar“, вечерва (22 октомври) во Галеријата при МКЦ, со почеток во 20 часот, ќе биде промовиран романот „18% сиво“ од бугарскиот писател Захари Карабашлиев.

Овој роман, напишан од перспективата на еден Бугарин што го живее едноличниот американски сон, се одликува со динамичен и хумористичен јазик.

Карабашлиев е познат бугарски прозаист и драмски автор, а пишува и филмски сценарија. Неговите драми се играни во Европа и во Америка. Делата му се преведени на речиси сите европски јазици.

Романот е бестселер во Бугарија со вкупно 22 изданија и е добитник на наградата „Роман на годината“ за 2008 година. Во анонимна анкета на телевизијата „Би-би-си“ е избран меѓу стоте омилени книги на бугарските читатели.

Ќе го промовираат литературните критичарки и универзитетски професорки Ангелина Бановиќ-Марковска и Елизабета Шелева, како и новинарката Јасна Франговска. Делови од романот, паралелно од оригиналот и од македонското издание, ќе читаат самиот автор и актерката Арна Шијак.