Приватните специјализанти наведуваат дека и покрај нивниот протест на 27 март и остварената средба со министерот за здравство во техничката Влада, Илир Демири, на 2 април, сѐ уште не биле исполнети нивните барања.
„На средбата со министерот за здравство, од негова страна ни беше ветено дека нашите барања ќе бидат изнесени на следната седница на Влада. После остварената средба со министерот, одржани се две седници на Влада и тоа на 3 и 9 април, на кои според јавно достапните информации на Влада, во ни една од нив не е разговарано за нашите барања“, соопштуваат специјализантите.
Поради тоа, како што се посочува во соопштението, испратено во име на приватните специјализанти при универзитетите за медицински науки „Кирил и Методиј“ и „Гоце Делчев“ – Штип, принудени се да направат следен чекор – пристапување кон генерален штрајк од 15 април.
Според најавите, тој би траел се’ до исполнување на нивните барања.
