Предолго време поминато пред екрани – мобилни телефони, компјутери или телевизори – може негативно да влијае врз сонот на адолесцентите и да го зголеми ризикот од појава на симптоми на депресија, особено кај девојчињата. Ова го покажува ново истражување на шведски научници објавено во научното списание PLOS Global Public Health.
Во меѓувреме, Шведската агенција за јавно здравје неодамна им препорача на адолесцентите да не поминуваат повеќе од два до три часа дневно пред екрани, делумно и за да се подобри квалитетот на нивниот сон.
Истражувачите во студијата следеле 4.810 ученици од Шведска на возраст од 12 до 16 години. Тие собирале податоци за времето поминато пред екрани, квалитетот и должината на сонот, како и за појавата на симптоми на депресија.
Резултатите покажале дека зголеменото време пред екран доведува до влошување на сонот во период од три месеци, влијаејќи и врз неговиот квалитет и врз неговото времетраење. Дополнително, утврдено е дека колку повеќе време тинејџерите поминуваат пред екран, толку подоцна одат на спиење.
Кај момчињата, подолгото користење екрани било поврзано со појава на симптоми на депресија дури по 12 месеци. Кај девојчињата, пак, ефектот бил забележан речиси веднаш.
„Сонот е клучен за развојот на адолесцентите. Оваа студија обезбедува биолошки веродостојни податоци што ја потврдуваат широко распространетата претпоставка дека времето пред екран влијае врз сонот и симптомите на депресија“, изјави Бен Картер од Кралски колеџ Лондон.
Сепак, не сите научници се согласуваат со заклучоците. Крис Фергусон од Универзитет Сетсон истакна дека мерењето на времето пред екран се темелело на самопријавување од страна на учениците, метод кој не секогаш е целосно сигурен и може да доведе до неточни резултати.
